बिस्का जात्रा मनाउने क्रममा रथले किचेर एक जनाको मृत्यु

भक्तपुर, १ वैशाख । भक्तपुरमा बिस्का जात्राको क्रममा रथले किचेर एक जनाको मृत्यु भएको छ । भैलखको रथ तान्ने क्रममा रथले किचेको हो ।

जीऊमाथि नै रथले किचेका कारण अन्दाजी वर्ष ३६ का सुशिल तमखूको मृत्यु भएको प्रहरीले जनाएको छ । भक्तपुर नगरपालिका वडा नं ४ निवासी उहाँ हाल भक्तपुरको सूर्यविनायक नगरपालिका ८, सिपाडोल इटबू बस्दै आउनुभएको थियो ।

बिस्का जात्राको चौथो दिन आज भेलुखेलस्थित योसिंखेलमा ५५ हात लामो लिङ्गो ठड्याउन भैरवनाथको रथलाई गाःहिटीबाट योसिंखेल लैजाने क्रममा तमखूलाई रथले किचेको थियो । तमखूको शरीरको बीच भागमा रथले किच्दा घटनास्थलमा नै मृत्यु भएको थियो ।